Dezenvolvimentu teknolojia dijitál iha Timor-Leste aumenta lalais iha tinan hirak ikus ne’e, hodi loke oportunidade boot tebes ba iha área edukasaun, komunikasaun no divertimentu. Maibé, asesu internet ne’ebé fásil mós lori risku sira, liuliu ba labarik sira ne’ebé seidauk komprende didi’ak perigu sira hosi mundu online.
Kazu sira kona-ba intimidasaun sibernétiku hanesan cyberbullying, fraude online, propagasaun konteúdu ne’ebé la apropriadu, no potensiál ba esplorasaun online mosu daudaun, ne’ebé ameasa labarik sira-nia seguransa no moris-di’ak. Aleinde ne’e, inan-aman, mestre sira, no komunidade lokál sira nia komprensaun kona-ba seguransa dijitál sei limitadu tebes, hodi halo labarik sira dalabarak laiha protesaun adekuadu.
Situasaun ida-ne’e ezije programa edukasionál ida ne’ebé komprensivu no prátiku atu ekipa labarik sira no adultu sira iha sira nia sorin ho abilidade sira atu rekoñese, prevene, no rezolve ho apropriadu risku dijitál sira. Haree ba situsaun sira ne’e, ChildFund nu’udar organizasaun naun-governamentál internasionál ida ne’ebé foka ba redusaun pobreza no defende labarik sira-nia direitu lansa programa protesaun labarik iha mundu internet ho naran Swipe Safe.
Plataforma Swipe Safe ne’e oferese solusaun inovativu ida, kombina formasaun oin-ba-oin no aplikasaun ida ne’ebé asesivel ho fasil, interativu hodi hadi’a literasia seguransa dijitál entre labarik sira, inan-aman sira, profesór sira, no komunidade sira iha Timor-Leste.
Swipe Safe hanesan programa formasaun no aplikasaun ida ne’ebé ajuda labarik, adolexente, no inan-aman sira iha Timor-Leste atu navega internet ho seguru. Programa ne’e hanorin labarik sira oinsá atu rekoñese risku sira online hanesan fraude, intimidasaun, no konteúdu ne’ebé la apropriadu liuhosi treinamentu prátiku no aplikasaun interativu ida. Swipe Safe mós serbisu ho eskola sira, família sira, no governu sira hodi kria espasu dijitál ida ne’ebé seguru liu ba labarik sira.
Benefísiu sira husi Programa Swipe Safe:
- Hasa’e konxiénsia entre labarik sira, adolexente sira, inan-aman sira, no mestre sira kona-ba perigu no risku sira hosi mundu dijitál.
- Fornese abilidade prátika sira hodi mantein seguransa dadus pesoál no identidade online sira.
- Prevene cyberbullying, fraude, no asesu ba konteúdu ne’ebé prejudisiál liuhosi edukasaun ne’ebé apropriadu.
- Hametin papél família, eskola, no komunidade sira nian hodi proteje labarik sira hosi risku dijitál sira.
- Fó apoiu ba dezenvolvimentu literasia dijitál nasionál ne’ebé adapta ba nesesidade Timor-Leste nian.
- Enkoraja hahalok ne’ebé responsavel no étika iha utilizasaun teknolojia no mídia sosiál.
Ho nune’e, programa ida-ne’e ajuda labarik sira no sira nia apoiante sira sai utilizadór online ne’ebé matenek no seguru liu!
Hakarak hatene informasaun ne’ebé klaru liutan kona-ba programa ChildFund Swipe Safe, bele asesu ba iha link ne’e: https://swipesafe.org