Maliana, 7 Agostu 2025 (RCM), Sekretáriu Estadu Komunikasaun Sosiál (SEKOMS) liu husi diresaun DNAF, departamentu Teknolojia Informasaun no Komunikasaun halo formasaun  jestaun website ofisiál ba  Manorin Nain iha Eskola Sekundária Jerál Públika Centrál Dom Martinho da Costa Lopes Maliana  durante  loron  rua.

Atividade ida-ne’e halao tanba  servisu hamutuk  entre Diresaun Nasionál Informasaun no Komunikasaun (DNIK) – Ministériu Transporte Komunikasaun (MTK), Ministériu Edukasaun no organizasaun  Child Fund Timor-Leste (CFTL).

Xefe departamentu TIK-SEKOMS  Sandra Brites ba jornalista sira iha eskola Dom Martinho da Costa Lopes informa  katak, objetivu husi vizita traballu ne atu  halo introdusaun kona-ba plataforma Jornál Parede Dijitál ka website dijitál  iha eskola Dom Martinho da Costa Lopes, nune’e  sira bele publika sira nia atividade hotu iha plataforma ne’e.

“Ninia objetivu prinsipal maka atu fasilita kriatividade, kolaborasaun, no espíritu hakerek husi manorin no estudante sira, enkuantu hametin literasia dijitál entre estudante no manorin nain sira mos. Liuhusi plataforma dijitál ne’e ida-ne’e, bele publika informasaun, opiniaun sira, atividade eskola nian, no obra kreatividade estudante nian, hodi  hafásil ba ema hotu hodi asesu informasaun hirak ne’e liuhosi internet ka dispozitivu dijitál”.

Alende ne’e mos,  xefe departamentu ne’e hateten eskola Dom Martinho da Costa Lopes Maliana tama iha lista pedidu  ne’ebe hato’o husi DNIK-MTK  hodi servisu hamutuk dezenvolve plataforma Jornál Parede Dijitál ba Ensinu Sekundária lima (5). DNIK-MTK mos planeia ona  sei oferese liña internet gratuita ba Eskola Sekundária Jerál Públika Centrál Dom Martinho da Costa Lopes Maliana.

Entretantu  xefe departametu  ne’e agradese ba DNIK-MTK ne’ebe fo fiar ona ba SEKOMS hodi dezenvolve no realiza atividade formasaun  ne’e.

Enkuanto Jornál Parede Dijitál ne’e  laos  kria  deit iha eskola Dom Martinho da Costa Lopes Maliana maibe kria mos ba eskola seluk hanesan Eskola Ensínu Sekundária Jerál 1912 Manufahi, Eskola Sekundária Jerál Públika Nino Konis Santana Ermera, Colégio de Santo Inácio de Loiola Kasait, Ensinu Secundária Tékniku Vokasional Dom Bosco Fatumaca, no ba futuru  sei iha planu hodi kria ka dezenvolve website ba eskola ensinu sekundária sira seluk ne’ebe maka  seidauk iha plataforma dijitál.

Iha fatin hanesan, diretur eskola Dom Martinho da Costa Lopes Maliana,  Juvinal  Dos Reis Fereira  informa  agradese ba IX Governu Konstitusionál ne’ebe liu husi SEKOMS mai kria ona plataforma Jornál Parede Dijitál ka website dijitál iha eskola ida ne’e hodi fo sai informasaun  atividade  iha eskola ida ne’e, tanba Dom Martinho da Costa Lopes Maliana hein kleur tiha ona atu publika informasaun atividade barak ne’ebe eskola halao liu ona iha tempu ne’ebá maibe  seidauk bele tamba la iha  website dijitál hanesan agora ne’e .

Diretur mos husu ba estudante no manorin nain sira atu utilija website dijitál ho diak, nune’e bele publika atividade eskola  nian ba públiku hotu iha ne’ebe deit bele asesu hotu ba informasaun hirak ne’e.

Ekipa RCM

Fonte Notísia : https://rcm.tl/sekoms-fo-formasaun-teknika-plataforma-jornal-parede-dijital/